Jauziak

Prestatzen ari gara…

Jauziak, korroan dantzatzen diren dantzak dira. Pausu bakoitzak bere izena dauka eta bana-banaka edo konbinatuta txandakatzen joaten dira. Jauziak eskumara begira hasten dira. Pausu ugari daude, esaterako jarraian agertzen direnak:

• Erdizka: Kanpoko hankarekin hasita, pausu bi aurrera, hirugarren bat kanpokoarekin eta barrukoarekin pikatu buelta erdi barrutik ematen delarik. Jarraian, barrukoa zena aurreratu eta kanpokoa zenarekin itxi, gentozenaren kontrako norabidera begira bukatzen dugula.
• Jauzi: Kanpoko hanka borobilaren kanpora atera pauso bat emanaz, barrukoarekin pikatu, barrukoa barruratu eta kanpokoarekin itxi. Jarraian mugimendu bera baina barrurantza, pausu simetriko bat balitz bezala; hots, barrukoarekin pausu bat barrura, kanpokoarekin pikatu, kanpokoa kanporatu eta barrukoarekin itxi.
• Dobla: Hau normalean ezkerrera begira gaudenean egiten da. Erlojuaren kontrako norantzan buelta oso bat eman behar da kanpoko hankaren ejean eta jarraian kanpokoarekin pikatu, kanpokoa aurreratu eta barrukoarekin itxi.
• Luze: Bi pausu aurrera, kanpokoarekin hasita.
• Pika: Barrukoarekin pikatu, kanpokoarekin pikatu, kanpokoa aurreratu eta barrukoarekin itxi.
• Ebats: kanpoko oinaren gaineran eutsirik eta horren ejean, buelta erdi egiten da salto bat emanaz atzera (buelta bitartean). Beste hanka kanpotik pasatzen da eta behin beste norantzan begira gaudela, oraingo kanpoko hankarekin pikatzen da, jarraian aurrera pausu bat eman eta barrukoarekin ixteko.
• Antzina: Luze eta jauzi.
• Zeina: Kanpokoarekin bi keinu, barrura eta atzera. Lekuan geldirik egiten da barruko hankaren gainean eutsirik.
• Ezker: Ezkerrera barrutik bira erdi eman, kanpoan geratzen denarekin pikatu, bera ere aurreratu eta barrukoarekin itxi.
• Eskuin: Eskuinera barrutik bira erdi eman, kanpoan geratzen denarekin pikatu, bera ere aurreratu eta barrukoarekin itxi.
• (Edozein pausu) eta hiru: Igarri daitekeenez pausu guztiak (zeina izan ezik) pikatzen, pikatutakoarekin aurreratzen eta bestearekin ixten bukatzen dute. Pausu bati «eta hiru» gehitzen zaionean, behin pikatu ordez, hirutan egiten da; hortaz, kanpokoarekin pikatu, barrukoarekin pikatu eta berriro kanpokoarekin pikatu egiten da, pausua betiko moduan bukatu aurretik (kanpokoa aurreratu eta barrukoarekin itxi)
• (Edozein pausu) bietan/lauetan: pausua bi aldiz edo lau aldiz jarraian egiteko esaten da.
• Kontrapasa: Kanpoko oinarekin pausu bat aurrera, bestearekin beste pausu bat ematen da kanpokoaren atzetik pasaz (orpoaren parera egon arte) eta kanpokoarekin pausu bat aurrera ematen da. Jarraian, berdina egiten da baa kontrako oinarekin. Barrukoak pausua ematen du, kanpokoa atzetik pasatzen da eta berriro ere barrukoak aurrera pausu bat ematen du.
• Entretxantak: normalean bukaeran egiten dira, kanpoko oina atera egiten da eta bueltan barruko oina barrutik kolpatzen du, jarraian barruko oina atzera irteten da eta bueltan barneko partearekin kanpoko oinaren orpoa kolpatzen du eta jarraian salto bat ematen den bitartean barruko oinaren orpoak kanpoko oina barrutik kolpatzen du hau atzera irten dadin.

Prestatzen ari gara…

Prestatzen ari gara…

Prestatzen ari gara…